Gunnar Geirsson

Jæja, þá er framsóknarmaddaman lögst á bakið eina ferðina enn og fnykinn leggur um sviðið.

Á hátíðisdögum ræða forkólfar stjórnmálaflokkanna það með trega og tárum hversu slæmt það sé að virðing fyrir stjórnmálum og stjórnmálamönnum fari þverrandi. Ef þú byrjar að saga af þér löppina og heldur því nógu lengi áfram, þá endar með því að hún dettur af.

Ætlar karlinn Ólafur með hálskeðjuna að snúa sér að heimilislækningum aftur? Það er gagn að íslendingar eru almennt heilsuhraustir.

Þetta leikhús fáránleikans sem rekið hefur verið í Óráð-húsinu í Reykjavík, þætti eflaust sérkennileg uppfærsla í einhverju fámennu byggðarlagi úti á landi.

[Athugasemdir: 0]

Nokkur umræða hefur orðið um aðbúnað fanga í nýju fangelsi á Akureyri og hefur ýmsum þótt nóg um hversu langt er gengið í að gera aðbúnað fanga sem bestan.  Ég er reyndar þeirrar skoðunar að frelsissviptingin ein og sér ætti að fara langt með að duga sem refsing.  Yfirvöld eiga ekki að auka á refsinguna með slökum aðbúnaði fanga.  Maðalvegurinn er trúlega vandrataður í þessu tilfelli, eins og ævinlega.

Fram hefur komið að þeir sem vistast í þessu nýja fangelsi séu svokallaðir “fyrirmyndarfangar”.  Það er einmitt það!  Hvernig í ósköpunum getur fangi verið öðrum til fyrirmyndar, á meðan hann situr inni og afplánar refsingu fyrir glæpsamlegt athæfi.

Hverjir eiga að taka þessa fanga sér til fyrirmyndar?

Börn og unglingar?  Foreldrar við uppeldi barna sinna?

Ég held ekki.

[Athugasemdir: 0]

Ég hef alltaf talið Ítali með skemmtilegri þjóðum. Ég hef heimsótt þá sem búa á norðurhlutanum og einnig hef ég dvalið á Sikiley. Ítalska unglinga umgekkst ég í nokkrar vikur í sálugri Tékkóslóvakíu á unglingsárum. Enn eru þeir að skemmta manni. Ég las skondna frétt þar sem fram kom að Ítalska ríkið hefur verið dæmt til að greiða samkynhneigðum manni, ígildi 12 milljóna króna í miskabætur vegna mismununar. Ástæðan: Jú, af því að hann er hommi þurfti hann að taka bílprófið að nýju, ella félli það úr gildi. Hann tók prófið, stóðst það og fékk ökuréttindin endurnýjuð, en einugis til eins ár í stað tíu. Já, þeir eru skratti skemmtilegir þarna á Ítalíu að sjá þetta augljósa samhengi: Hommi = skert ökuréttindi.

Mér er reyndar hulin ráðgáta hvers vegna manngarmurinn var að taka það sérstaklega fram við við læknisskoðun, þegar hann skráði sig í herinn, að hann væri hommi. Enn síður skil ég af hverju viðkomandi læknir var að láta samgönguráðuneytið vita af kynhneigð mannsins! Af hverju ekki Rafmagnseftirlitið?

Ég legg til að allir þeir sem eru með skotvopnaleyfi og eru rauðhærðir og örvhentir, verði hér eftir kallaðir í árlegt próf.

[Athugasemdir: 0]

Í fréttum Sjónvarpsins í kvöld var viðtal við Albert Eiríksson, safnstjóra Fransmanna á Íslandi, sem staðsett er á Fáskrúðsfirði. Þar vakti Albert máls á því þjóðþrifamáli að gera upp Franska spítalannn sem staðið hefur við Hafnarnes og grotnað niður undanfarna áratugi. Vonandi tekst sem allra fyrst að útvega fé til verksins og hefja veg þessa merka húss til fyrri virðingar hér á Fáskrúðsfirði. En í lok viðtalsins setti að mér hroll því Albert hafði orð á því að það væri í raun merkilegt að ekki væri enn búið að kveikja í húsinu! Einmitt!! Endilega benda á það í sjónvarpi allra landsmanna að enn sé ekki búið að kveikja í því!

Gæti verið að innan skamms hætti menn að huga að fjármögnun endurbyggingar Franska spítalans vegna þess að hann verði horfinn uppí loftið?

[Athugasemdir: 0]

Getur það verið að nafni minn, presturinn í tímabundnu leyfi, Björnsson sem sætir kæru fyrir kynferðisbrot gegn amk. tveimur unglingsstúlkum hafi setið undir setningarræðu biskups við prestastefnu í Dómkirkjunni, þar sem biskupinn sagði m.a.: “Kirkjan vill og á að vera bandamaður barnsins, talsmaður barnsins og fjölskyldunnar, barnafjölskyldunnar umfram allt.” og “Ofbeldi gegn börnum er illt og óguðlegt athæfi, og hrópar upp í himininn. Vanræksla er ofbeldi, sem veldur mikilli vanlíðan barna og brýst út í andfélagslegri hegðun, skemmdafýsn og árásagirni. og “. ? .. eða var biskupinn utan þessa heims þegar kærumálið kom upp?

Uppfærsla: Var að lesa DV (gamalt blað) og þar kom í ljós að fjórar stúlkur hafa lagt fram kærur á hendur síra Gunnari en hann “telur að um misskilning sé að ræða.”

[Athugasemdir: 0]

Mikið hefur þessi umræða um dauða ísbjörninn fallið í fyrirséð far. “101-náttúru-lista-vistvæna-græna-lífræna-á móti flugvellinum-á móti álverum-á móti togveiðum-á móti hvalveiðum-allt bannað nema það sem sérstaklega er leyft=lið mætti í hin hefðbundnu viðtöl og romsaði uppúr sér fyrirséðum ræðum um að aðvitað hefði bara átt að svæfa hann og skila honum á heimaslóðir. Þrátt fyrir að ljóst væri að ekki voru til tæki né tól til að svæfa hann, ekki til búnaður til að geyma björninn og halda honum í skefjum eftir svæfingu. Ekkert lá fyrir hvernig átti að flytja hann mörg hundruð mílur norður með ströndum Grænlands. Til að kóróna vitleysuna er nokkuð ljóst að Danir hefðu alfarið lagst gegn því að bangsi litli hefði verið fluttur á heimaslóðir vegna sjúkdómavarna. Hann var jú búinn að ramba um í íslenskri náttúru. Hún er hvorki sótthreinsuð né gerilsneydd eins og ætla mætti af málflutningi ofangreinds hóps.

Það var tilviljun að þokan náði ekki niður að sjávarmáli þegar bangsi var á ferðinni. Ætli þessi hópur hefði eitthvað lagt til málanna ef bangsinn hefði ranglað í þokunni niður í byggð og rifið í sig eins og einn grunnskólakrakka eða bústna heimasætu á einhverjum sveitabænum? Nei auðvitað átti að skjóta hann. Það eru eðlileg, sjálfsögð og viðurkennd viðbrögð við stóru og hættulegu villidýri í mannabyggð.

Hluti af hópnum, Björk og Sigur Rós ætla að halda tónleika “til stuðnings náttúrunni” og af gæsku sinni “bjóða” þau almenningi, endurgjaldslaust. En eins og alltaf, þá er ekkert ókeypis. Reykjavíkurborg ætlar að styrkja framtakið um fjórar milljónir og ýmis fyrirtæki um óþekktar upphæðir. Þetta segir mér að þetta annars ágæta tónlistarfókl skrifar væntanlega út reikninga að afloknum tónleikum, hvað sem stuðningi við náttúruna líður.

Ekki kæmi mér á óvart að einhver Björkin eða Rósin úttalaði sig með ekka í koki og tár á hvarmi um hið viðurstyggilega ísbjarnardráp.

Það er lítið um óvæntar heimsóknir ísbjarna í 101.

[Athugasemdir: 1]

Nú er komin endanleg staðfesting á sumrinu: Búið að tappa bensíninu af snjósleðanum og fylla með því takninn á garðsláttuvélinni, tankinn á utanborðsmótornum og restina fékk sonurinn á mótorhjólið.

[Athugasemdir: 0]

Hvað eru menn að væla yfir háu bensínverði?  Vitiði hvað líterinn af kveikjarabensíni kostar?  Nei, mig grunaði það!  Hann kostar 5.600,- kr.   fimm þúsund og sex hundruð krónur!!  Í Lísusjoppu.  Það er gagn að maður ekur ekki um á Zippo!

[Athugasemdir: 0]

Jæja, auðvitað kom á daginn að Mogga-”fréttin” í gær var enn eitt déskotans upphlaups-móðursýkis-ruglið sem enginn fótur var fyrir.

Nú hljóðar pistill dagsins svo, í Mogga:

“Sílamávurinn á ekkert í álftina. Álftin dræpi sílamávinn eins og að drekka vatn,“ segir fuglafræðingurinn Jóhann Óli Hilmarsson varðandi fréttir þess efnis að mávar hafi gert árás á álftapar á Bakkatjörn og étið egg þeirra.

Fréttin vakti mikla athygli í gær, en margir fuglafræðingar hafa hins vegar átt erfitt með að trúa þessum fréttum - fannst þær harla ólíklegar. Skýringin sé einföld - mávar eigi ekki roð í álftir líkt og Jóhann Óli bendir á.

Nánari athugun fuglafræðinga á aðstæðum á Bakkatjörn í gærkvöldi staðfesti að grunur þeirra reyndist á rökum reistur. Álftin sást liggja á tveimur eggjum og því er útlit fyrir álftarungar muni komast á legg á Seltjarnarnesinu.

Jóhann Óli segir ljóst að einhver misskilningur sé á ferðinni hjá þeim sem telja sig hafa séð máva ráðast á álftir.”

Lúkasinn lifi!!

[Athugasemdir: 0]

Ég er í algeru sjokki. Í fyrradag varð ég vitni að því, þegar ég gerði að stórum steinbít að hann hafði étið krabba, ekki bara eitt stykki heldur marga, já örugglega ein fimmtán stykki!  Ætli ég verði ekki að hafa samband við fjölmiðla og sjá til þess að þjóðin frétti að þessum hryllingi. Hafiði heyrt annað eins?

Já, ég hef reyndar lesið annað eins í Mogga. Ekki eins, að vísu, heldur enn vitlausara. Fyrirsögnin: “Harmleikur á Bakkatjörn” fangaði þar athygli mína. Ég sá fyrir mér að barn hefði fallið í tjörnina og drukknað eða eitthvað á þeim nótum. Eftir formanni umhverfissviðs Seltjarnarness var haft: “Það varð harmleikur í gær.” Hver var nú “harmleikurinn”? Jú, mávar fengu sér álftaregg að éta! Og hvað með það? Egg eru fæða máva. Ekki þverskorin, soðin ýsa.

Hversu fjarri er þetta fólk orðið náttúrunni og gangi hennar, þegar það kallast harmleikur á höfuðborgarsvæðinu, þegar mávur étur egg og telst þar að auki vera fréttaefni?

Reyndar hafa fuglafræðingar gert athugasemdir við fréttina og telja að álftir séu fullfærar um að verjast ágangi máva.

Heyri ég nokkuð kallað: Lúkas, hvar ertu?

[Athugasemdir: 1]

Einn af kostum þess að vera á grásleppuveiðum er meðaflinn. Nú er búið að elda og borða steinbít, þorsk, skarkola, sandhverfu, rauðmaga……

…. og hnísu og …..

svo kemur forrétturinn ……

… og forréttur númer tvö.

Nú, ef það syndir ekki, þá er bara að munda haglarann….

.. og hávellur í restina.

Signa grásleppan er alveg að verða tilbúin. Hennar bíður grillið.

[Athugasemdir: 0]

Norskur línuveiðari var tekinn við ólöglegar veiðar á friðuðu svæði út af suðausturlandi í fyrradag. Alvarlegt brot? Já! Sektin: 500.000,- kr. Fimm hudruð þúsund krónur þarf útgerðin að greiða fyrir þetta brot! Auk þess var afli og veiðarfæri að sjálfsögðu gerð upptæk eins og venja er. Man enginn hvernig Norðmenn tóku á villum í skráningu afla hjá íslenskum skipum í landhelgi þeirra eða hvernig þeir komu fram við tilraunir til að lyfta Guðrúnu Gísladóttur KE af hafsbotni?

Hvurslags andskotans undirlægjuháttur er þetta alltaf gagnvart þessum “frændum” okkar?

Það vantar a.m.k. eitt núll í þessa upphæð.

[Athugasemdir: 0]

Síðastliðinn laugardagsmorgun lögðum við nokkrir félagar land undir fót og héldum út norðurströnd Reyðarfjarðar með snjósleðana okkar í eftirdragi í þvílíkri brakandi blíðu og settum stefnuna á Vöðlavík, sem er norðan Reyðarfjarðar.

Myndin er tekin yst í Vöðlavík, að norðanverðu.

Eftir að hafa farið allt til sjávar í Vöðlavíkinni var haldið uppúr henni og til norðurs til Viðfjarðar og þaðan var enn haldið í norður og kíkt niður í Hellisfjörð. Í bakaleiðinni var ákveðið að halda austur fjallgarðinn milli Vöðlavíkur og Reyðarfjarðar.

Þar blasti eyjan Skrúðurinn og Vattarnesið við.

Þrátt fyrir sólbruna og harðsperrur var farið á fætur kl. 4:30 til móts við grásleppuna og uppúr hádegi vorum við búnir að landa þremur tunnum af hrognum.

Þetta verður ekki betra.

[Athugasemdir: 0]

Að undanförnu hefur veður hér á Austurlandi verið einstaklega gott, algert dauðalogn og glampandi sól, dögum saman. Það má m.a. sjá af þessum myndum sem teknar voru á grásleppuveiðum í vikunni.

 

Víkurskerið í forgrunni, þá Vík og Sandfellið gnæfir þar yfir.

 

 

Útgerðarmaðurinn og skipstjórinn Hermann Steinsson í slag við þarann.

[Athugasemdir: 0]

Skemmtilegur tími framundan:  Vakna 5:30 til að fara á sjó og vitja um 6 gráslepputrossur í norðanverðum Fáskrúðsfirði. Þar sem selir koma alltaf annað slagið í netin erum við búnir að lesa okkur til um hvernig á að standa að fláningu og verkun selskinna og ætlum að gera tilraun næst þegar færi gefst.  Það hefur bæði sést til lunda og hávella og því er búið að pússa haglarann.  Í landi um hádegi á morgun. Þá taka pappírarnir við, uppgjör á kolasölu í Grimsby af snurvoðarbáti frá Þórshöfn og vinna við að loka ársreikningi vélaverkstæðis á Fáskrúðsfirði.  Laugardagurinn?  Sól og blíða um allt austurland: Snjósleðaferð um hálendið allan laugardaginn.  Einhæft og leiðinlegt?  Nei!

[Athugasemdir: 0]

Jæaj, vorið ER komið. Búið að vitja tvisvar um grásleppunetin, búið borða rauðmaga  í  fyrsta sinn þetta árið, þrastapörin í trjánum í garðinum okkar að missa sig í söngnum, nýveiddur koli á útigrillinu í kvöld og bíllinn gljánadi eftir sápuþvottinn.

Já það er komið vor þrátt fyrir alhvíta jörð.

[Athugasemdir: 0]

Þegar stjórnvöld taka ákvörðun um að draga úr þorskveiðum og fara samhliða út í mótvægisaðgerðir, dettur manni helst í hug að þær komi til framkvæmda í þeim byggðarlögum sem stunda sjávarútveg. Á sama hátt og mótvægisaðgerðir vegna hruns í tómata- og gúrkurækt kæmu væntanlega fram í Hveragerði en ekki í Grímsey. En allt er á haus “hér á landi á” eins og svo oft áður! Hin grátbroslega staðreynd blasir t.d. við að ríkisvaldið bætti við tveimur störfum á Egilsstöðum vegna samdráttar í þorskveiðum.

Að vísu fann Bæjarráð Fljótsdalshérað út að það væri víst gúrkurækt í Grímsey, því “að skreiðarverksmiðja í sveitarfélaginu byggir meðal annars starfsemi sína á þorskveiðum.” Jamm, þeir þurrka þorskhausa á Héraði.

Þau nýju störf sem fundinn var staður á Héraði í tengslum við minnkandi þorskveiðar, felast í tölvuskráningu á upplýsingum uppúr gömlum manntölum. Hrafnkell Lárusson, forstöðumaður Héraðsskajalasafns Austurlands, getur þess í grein í Austurglugganum þann 28. febrúar sl. að ástæður þess að ekki megi vinna við þessa skráningu annarsstaðar á  Austurlandi en á Egilsstöðum vegna þess að “Í fyrsta lagi leggur Þjóðskjalasafnið ríka áherslu á að mjög sé vandað til meðferðar og geymslu gagnanna sem unnið er með, enda um gömul og viðkvæm gögn að ræða sem aukinheldur eru einstök og verða ekki bætt skemmist þau eða eyðileggist. Varðveisluskylda skjalasafna er mjög rík.”

Enn vaxa gúrkur í Grímsey, því í dag greinir safnstjóri Minjasafns Austurlands, sem er í sama húsi og Héraðsskjalasafnið, frá því að ástand safnahússins á Egilsstöðum sé með þeim hætti að óviðunandi sé, það leki inn á fjölda staða, safngripir séu í hættu og vegna ástandsins sé til lítils að hafa þar raka- og hitastýringu.

Ég er nánast alveg viss um að þessa skráningavinnu hefði verið hægt að vinna á einhverjum þeirra staða hér á Austurlandi, sem sátu uppi með skerðingu á aflaheimildum. Þar eru að minnsta kosti þó nokkur hús sem eru bæði vind- og vatnsheld.

Er ekki orðið nóg af þorskhausum á Héraði?

[Athugasemdir: 0]

Þessa dagana er ég að lesa Ævisögu Árna Þórarinssonar eftir Þórberg Þórðarson. Hana las ég fyrir mörgum árum og hún hefur bara batnað síðan.

Þar var komið sögu, eitt kvöld fyrir skömmu, þegar ég lá uppí í rúmi og las, að Árni er að segja frá einum af merkari kennurum Latínuskólans, (eða bara MR) Steingrími Thorsteinssyni. Tekið skal fram að þetta átti sér stað um 1880 Þar segir: “Það slys vildi til, að heldri frú í Reykjavík datt og viðbeinsbrotnaði. Það þykir ekki sérlega háskalegt áfall. En frúin tók þessu svo alverlega, að hún sigldi til Kaupmannahafnar til þess að láta græða brotið. Þegar Steingrímur heyrði um utanför frúarinnar, varð honum að orði: “Senn fer þetta heldra fólk í Reykjavík að sigla til að laxera”.

Er Jónína Ben ekki enn að láta hamast á “þessu heldra fólki” í Póllandi?

[Athugasemdir: 0]

„Brennisteinsvetni í andrúmslofti í nágrenni höfuðborgarinnar er orðið svo mikið að það getur hugsanlega valdið fólki með lungnasjúkdóma óþægindum og jafnvel haft ófyrirséðar afleiðingar fyrir heilbrigt fólk til langs tíma litið.”  Þetta kom fram í viðtali við Sigurð Þór Sigurðarson, lungnalækni og sérfræðingu í atvinnu- og umhverfissjúkdómum í 24 stundum í dag.  Hann benti jafnframt á að brennisteinsútblástur frá virkjunum valdi stöðugri mengun í langan tíma. „Og það getur hugsanlega haft uppsöfnuð áhrif á þá sem lifa í þessu umhverfi. Það getur tekið allt að 10 til 20 ár að koma í ljós hvort mengunin hafi t.d. áhrif á þroska barna.”

Þessi mengun á höfuðborgarsvæðinu er af völdum hinnar náttúruvænu Hellisheiðarvirkjunar sem gangsett var haustið 2006. Og áæltlanir eru upp um að bæta enn í með nýjum, svona líka grænum, gufuaflsvirkjunum á svæðinu. Aldeilis munur, maður minn, engin ógeðslega blaut og gruggug uppistöðulón eins og fyrir austan, þar sem blessuð hreindýrin blotnuðu í lappirnar og gæsirnar þurftu að flytja sig um set með hreiðrin sín.

 Brennisteinsvetnið er svo vistvænt. Svo er lyktin svo góð.

 Eini sjáanlegi gallinn er sá að það þarf alltaf að vera að hreinsa silfurborðbúnaðinn.

[Athugasemdir: 0]

 

Það vekur yfirleitt ekki með mér neina sérstaka kátínu að hirða ruslpóstinn upp af forstofugólfinu heima hjá mér í hádeginu alla virka daga. Reyndar kallar gluggapósturinn ekki heldur á neinn hlátur. Innan um vörulista m.a. frá BT, Byko, Húsasmiðjunni, Elko og ýmsum öðrum, leynist nokkrum sinnum á ári lítill og nettur listi frá Belís Heilsuvörum ehf. Hann vekur mér kátínu og á stundum ofsafenginn hlátur. Í listanum er úrval vara sem eiga það sammerkt að minnka ummál fólks. Oftast eru þetta töflur, duft eða belgir sem viðkomandi étur og við það á hann svo að minnka smátt og smátt í framhaldinu. Nú er komin enn ein nýjungin: Gostafla! Eins og segir í bæklingnum: „Enginn vondur drykkur, engar stórar pillur sem erfitt er að kyngja..” Jæja, trúlega er það framför. En hvað ætli sé nú í þessari galdratöflu? Jú: “Náttúrulegt trefjaextract úr skeljum skeldýra! Trefjaextractið getur haldið fitunni niðri með því að sjúga hana í sig. Hún safnast ekki á þig.” Og auðvitað heitir taflan „Easy Off” Hvað annað?

Þessi bæklingur er hreint út sagt endalaus uppspretta taumlausrar gleði. „Easy Off” á forsíðu og strax á blaðsíðu 2 er einhver elexír sem kemur í veg fyrir inngrónar táneglur og á blaðsíðu 4 eru til segularmbönd sem hafa „jákvæð áhrif á blóðrásina” og annað með „sex aflmikla bio-segulmagnaða punkta”.

Einnig er til sölu armband sem „upprunalega var hannað fyrir Sung keisaraættina” Þetta armband „er með 6 gömlum verðmætum steinum” Já það er ekkert annað, verðmætum steinum og gömlum að auki. Herlegheitin kosta kr. 2.390 eða liðugar 398 kr. á hvern stein, fyrir utan armbandið sjálft! Þetta getur ekki klikkað. Á sömu síðu er alveg einstakt tilboð sem ekki er hægt að láta fara fram hjá sér. Þar eru auglýst dömu og herraúr, gulllituð kvartsúr skreytt með innfelldum DEMANTI, meira að segja „fínskornum”. Þá er bara að panta eins og 2000 stykki, plokka úr þeim „demantana”, selja þá og panta snekkjuna. Rakið, því hvert úr kostar einungis 1.999 kr. með demantinum. Þess er jafnframt getið að um einkahönnun sé að ræða og hún sé eftir Robert Rosner. Ég „Gúgglaði„ manninn. Ekki veit ég hvað stjarneðlisfræðingurinn Robert Rosner hjá The University of Chicago er að dunda við að hanna þessi líka flottu demantsúr, en trúlega á hann alnafna einhversstaðar.

Ég er bara kominn á blaðsíðu 11 af 32.

[Athugasemdir: 0]

« Fyrri skrif